Büdcəyə dəyişiklikləri Qarabağ və Şərqi Zəngəzur büdcəsi kimi qiymətləndirilməlidir və bu, faktiki olaraq belədir.
Tacxeber.com xəbər verir ki, bunu deputat Fazil Mustafa Milli Məclisin növbədənkənar iclasında 2023-cü il büdcəyə dəyişikliklərin müzakirəsi zamanı deyib.
Onun sözlərinə görə, büdcəyə əlavələr əsasən işğaldan azad olunmuş ərazilərin yenidən bərpası üçün nəzərdə tutur.
“Bu da təqdir olunasıdır. Bu vəsait Qarabağın və Şərqi Zəngəzurun dirçəldilməsinə yönəldilir. O baxımdan biz bunu Qarabağ və Şərqi Zəngəzur büdcəsi kimi qiymətləndirməliyik”, – deputat qeyd edib.
O əlavə edib ki, aztəminatlı təbəqənin də sosial müdafiəsi istiqamətində ciddi addımlar atılmalıdır: “Xüsusən də dərmanların qiymətinin tənzimlənməsi istiqamətində. Bu gün dərman qiymətləri həddindən artıq bahadır və sosial təminatı az olan insanların dərman almağa imkanı çatmır. Dərmanların da qiymətinin endirilməsi istiqamətində ciddi işlər görülmür. Bu sahəyə diqqət yetirmək lazımdır”, – o qeyd edib.
