Kriştianu Ronaldo üçqat dünya çempionu Pelenin vəfatı ilə bağlı instaqram hesabında paylaşım edib.
Portuqaliyalı Pelenin ölümündən kədərləndiyini bildirib.
“Bütün Braziliyaya, xüsusən də cənab Edson Arantes do Nascimentonun ailəsinə dərin hüznlə başsağlığı verirəm. Hazırda bütün futbol dünyasını əhatə edən ağrını ifadə etmək çox çətindir. Pele milyonlarla insan üçün ilham və əbədi olaraq bir istinad idi. Onun mənə həmişə göstərdiyi məhəbbət və uzaqdan da olsa, paylaşdığımız hər an qarşılıqlı idi. O, heç vaxt unudulmayacaq və xatirəsi hər bir futbolsevərimizdə əbədi yaşayacaq. Rahat yat, Kral Pele”,- deyə Ronaldo bildirib.
Xatırladaq ki, 1940-cı il təvəllüdlü Pele futbol üzrə yeganə üçqat (1958, 1962, 1970-ci illər) dünya çempionudur. Bundan əlavə Braziliya millisinin hücumçusu Pele karyerası ərzində 1279 qola imza ataraq Ginnessin Rekordlar Kitabına düşüb.
