Ötən həftənin şənbə günü Amerika Birləşmiş Ştatlarının Mərkəzi Komandanlığı – CENTCOM Yəmənin Səna və Səada bölgələrində İranın dəstəklədiyi husilərin mövqelərinə kütləvi hücumlar həyata keçirib.
Bununla bağlı “Azad İran” “YouTube” kanalı videosüjet hazırlayıb.
Hücumda iştirak edən təyyarələr Qırmızı dənizdəki aviadaşıyıcı gəmidən havaya qalxaraq tapşırığı yerinə yetiriblər. Hücum başlamazdan bir saat əvvəl ABŞ Prezidenti Donald Tramp husilərə xəbərdarlıq edib ki, gəmiləri hədəfə almaq və İsrailə raket zərbələri endirmək də daxil olmaqla, öz hərəkətlərini dayandırmasalar, “cəhənnəmi yaşayacaqlar”.
Tramp, həmçinin xəbərdarlıq edib ki, İran husilərə dəstəyini dayandırmasa, ABŞ onu “tam məsuliyyətə cəlb edəcək və biz artıq bu məsələdə yumşaq davranmayacağıq”.
Xarici işlər və müdafiə nazirləri ilə birlikdə Vaşinqtonda bir otaqdan əməliyyatı izləyən ABŞ prezidenti “Truth Social” platformasında yazıb ki, o, ABŞ ordusuna Yəməndə husi terrorçularına qarşı qəti və güclü hərbi əməliyyatlara başlamağı əmr edib.