Avdeyevka istiqamətində gedişat onu deməyə əsas verir ki, Rusiya ordusunun Yeni ilə qədər bu şəhəri tutmaq şansı yoxdur.
Bunu ukraynalı hərbi-siyasi müşahidəçi Aleksandr Kovalenko deyib.
Onun sözlərinə görə, bu istiqamətdə döyüşlər kifayət qədər gərgin olaraq qalır, lakin indi ruslar zirehli texnikanın əhəmiyyətli dəstəyi olmadan, əsasən piyadalardan istifadə edir:
“Bu, ciddi uğur qazandırmır və əsas yüksəkliklər Ukrayna Silahlı Qüvvələrindədir. Bəzi ərazilərdə düşmən hətta geri çəkilir”.
Ekspert hesab edir ki, Putin media və xalqla, eləcə də Yeni il ərəfəsində fəst-fud istehlakçılarına müraciət edənədək Avdeyevkanı mühasirəyə almaq mümkün olmayacaq.
Hərbi müşahidəçi qeyd edib ki, prosesi sürətləndirmək üçün Rusiya ordusunun komandanlığı bu istiqamətdə yeni birləşmələr yerləşdirməyə çalışacaq:
“Amma burada sual yaranır: yanvara qədər bu ehtiyatlar tükənəndə ruslar gücünü haradan alacaq?” (Axar)
