Prezident İlham Əliyev iddia edib ki, Donald Tramp yeni müharibəyə başlamamış yeganə ABŞ Prezidentidir. Tacxeber.com xəbəbr verir ki, “Fakt Yoxla” iddianın doğru olub-olmadığını yoxlayıb.
ABŞ formal müharibələri çox nadir hallarda elan edir. Belə ki, quruluşundan bəri ABŞ yalnız 5 dəfə rəsmi şəkildə müharibə elan edib.
ABŞ son onilliklərdə müharibələrə əsasən rəsmi elan olmadan, ya Konqresin “hərbi gücdən istifadə səlahiyyəti” (AUMF) əsasında, ya da birbaşa prezidentin göstərişi ilə daxil olub. Məsələn, Vyetnam, Əfqanıstan və İraq müharibələri bu qəbildəndir.
Trampın prezidentliyi dövründə ABŞ İran generalı Qasim Süleymanini 2020-ci ildə Bağdadda öldürüb, 2025-ci ildə İranın nüvə obyektlərinə zərbələr endirib və Yəməndə yerləşən Husiləri 6 həftə bombardman edib. Bu əməliyyatlar rəsmi müharibə olmasa da, faktiki hərbi qarşıdurma və eskalasiya nümunələridir.
Rəsmi hesablamalara görə, Trampın 2025-ci ilin yanvar ayında prezident səlahiyyətlərini icra etməyə başladığı tarixdən iyul ayına kimi, yəni 5 ay müddətində ABŞ 240 ərazini 529 dəfə bombalayıb.
Donald Trampı yeganə “müharibəyə başlamamış Prezident” kimi təqdim etmək tarixi baxımdan da yanlışdır. Belə ki, 1950-ci ildən sonra ən azı üç prezident ABŞ-ni yeni müharibəyə cəlb etməyib.
“Fakt Yoxla”nın gəldiyi nəticəyə görə, İlham Əliyevin iddiası yanlışdır.