ABŞ-ın Kaliforniya ştatının Los-Anceles şəhərində immiqrasiya işçilərinin reydlərinə qarşı etirazlar üç gündür ki, davam edir.
Prezident Donald Tramp etirazları yatırmaq üçün 2,000 əsgərlik Milli Qvardiya birləşməsini şəhərə yeritmək əmri verib.
Bu, 1965-ci ildən bəri prezidentin ştat qubernatoru ilə razılaşmadan qoşun yeritdiyi ilk hadisə olub.
Lakin etirazlar bundan sonra daha da qızışıb və minlərlə insan küçələrə axışıb.
Meksika bayraqları dalğalandıran etirazçılar əsas magistral yolu bağlayıblar və avtopilotlu avtomobilləri yandırıblar, hüquq-mühafizə orqanları və ordu isə izdihamı nəzarət altına almaq üçün gözyaşardıcı qaz, rezin güllələr və səs qumbaralarından istifadə edirlər.
Polis onlarla etirazçını həbs edib. Onların arasında polisə molotov kokteyli atanlar da var.
Trampın Los-Ancelesə qoşun yeritməsi onunla Kaliforniya ştatının Demokratlar Partiyasından olan rəhbərliyi arasında fikir ayrılığı yaradıb.
Ştatın qubernatoru Qavin Nyusam buna ehtiyac olmadığını, əksinə, milli qoşunun yeridilməsinin etirazların böyüməsinə səbəb olduğunu deyib. (ToplumTV)
