Bu gün ölkə Prezidenti Azərbaycanın Cəbrayıl rayonunun Soltanlı kəndinin tikintisinin birinci mərhələsinin açılışında iştirak edib.
Düşünürəm ki, dövlət başçısının bu kəndə səfərini təşkil edən məmurlar Prezidenti ciddi şəkildə pis vəziyyətdə qoyublar.
Kəndin baş planı Macarıstanın «KESZ Group» şirkətinin və «BakıDövlətLayihə» layihə institutunun memarları tərəfindən birgə hazırlanıb.
Təəssüf ki, layihələndirmənin dəyəri barədə maliyyə məlumatları geniş ictimaiyyət üçün əlçatmaz olaraq qalır və gizli saxlanılır. Heyif! Belə primitiv layihəyə mən bir manat da verməzdim!
Üstəlik, xalqımıza qarşı açıq-aşkar istehza etdiklərinə görə bu uğursuz mütəxəssislərin məsuliyyətə cəlb olunmasını təklif edərdim. Çünki xalqımıza müasir, rahat və hərtərəfli yaşayış mühiti əvəzinə, planlaşdırma quruluşu konsentrasiya düşərgəsini xatırladan kazarma tipli məskunlaşma prinsipi təklif olunur.
Tikintinin monotonluğu, küçələrin primitiv düzbucaqlı şəbəkəsi, məkan müxtəlifliyinin, memarlıq ifadəliliyinin və yaşayış mühitinin özünəməxsusluğunun olmaması. İnsanlar üçün dolğun, canlı və cəlbedici mühit yaratmağa ən kiçik cəhd belə göstərilməyib. Elə təəssürat yaranır ki, layihəçilər müasir yaşayış məntəqəsi yaratmaqla deyil, ərazidə yaşayış qutularını mexaniki şəkildə yerləşdirməklə məşğul olublar!
Özü də XXI əsrdə! Müasir memarlıq və şəhərsalmanın insana layiq yaşayış mühiti yaratmaq üçün nəhəng imkanlara malik olduğu bir dövrdə!
Doğrudanmı, belə bir nəticə əldə etmək üçün xarici şirkəti cəlb etmək lazım idi? Məgər bu cür primitiv planlaşdırma sxemini xarici mütəxəssislərin xidmətlərinə müraciət etmədən, öz qüvvəmizlə çəkmək mümkün deyildi?
Son aylarda mətbuatda yayılan xəbərlərə əsasən, korrupsiyaya qarşı mübarizədə müəyyən irəliləyişlər müşahidə olunur. Buna görə də ümid edirəm ki, nə vaxtsa hüquq-mühafizə orqanları hazırlanma dəyəri nədənsə ictimaiyyətdən gizli saxlanılan bu layihə ilə də maraqlanacaqlar.
Cəmiyyət bu qədər şübhəli nəticəyə nə qədər dövlət vəsaitinin xərcləndiyini bilməyə haqlıdır. Eləcə də bu layihəni həyata keçirilməyə layiq hesab edənlərin məhz kimlər olduğunu.