Dünən gecə Rusiya və Ukrayna anbar və mülki infrastruktur obyektlərinə bir sıra zərbələr endiriblər.
Ukrayna dronları Tula vilayətinin Aleksin şəhərində yerləşən Wildberries şirkətinin ən böyük anbarına hücum edib. İlkin məlumatlara görə, təxminən 300.000 kvadrat metr sahəni əhatə edən bütün anbar kompleksi alovlar içində qalıb.
“Təcili yardım xidmətləri hadisə yerində işləyir. Yanğınsöndürənlər yanğını söndürürlər. İlkin məlumata görə, ölən yoxdur, lakin bir nəfər yaralanıb və lazımi tibbi yardımı alır”, – deyə Tula vilayətinin qubernatoru Dmitri Milyayev bildirib.
Onun sözlərinə görə, bazar anbarından əlavə, Venevski rayonundakı iki çoxmənzilli bina, eləcə də Novomoskovsk və Uzlovski rayonundakı iki sənaye obyekti zərər görüb.
Öz növbəsində Rusiya Kiyevə və Kiyev bölgəsinə kütləvi hücuma keçib. İlkin məlumatlara görə, bölgədə 17 nəfər ölüb, 27 nəfər yaralanıb. Kiyevdə isə bir nəfər ölüb, 44 nəfər yaralanıb.
Logistika infrastrukturu obyektlərinə də zərbə dəyib. Kiyevin Obolonski rayonunda Nova Poçta filialına ziyan dəyib, Brovaridə isə Rozetka onlayn mağazasının anbarı və Epicenter şəbəkəsinin anbarlarından biri dağıdılıb.
Bundan əlavə, Kiyevdə və ətraf bölgədə yaşayış binaları, sənaye müəssisələri, anbar kompleksləri və digər mülki infrastruktur obyektləri, o cümlədən Borşahivka ərazisindəki anbarlar hücuma məruz qalıb.