Tanınmış iqtisadçı, Respublikaçı Alternativ Partiyasının Siyasi Komitəsinin sədri Natiq Cəfərli, Əli Kərimlinin həbsi fonunda bildirir ki, hökumət siyasi məsuliyyət hissindən çıxış edərək ölkədə “təmizləmə” aparmalıdır. Onun fikrincə, bu prosesdən sonra real islahatlara başlamaq imkanı yaranacaq. Natiq Cəfərli misal kimi Müdafiə Nazirliyini göstərir: Ramiz Mehdiyevin təsir imkanları orada məhdudlaşdırılandan sonra nazirlik daha ciddi addımlar ata bildi.
Demək olar, hər gün Azərbaycan iqtidarını siyasi və iqtisadi islahatlara başlamağa çağırıram. Əgər islahatların başlanması üçün müxalifətin həbsi vacib şərtdirsə, buna heç bir etirazım yoxdur. Təkcə AXCP və ya Müsavatı deyil, istəsələr “avtobus müxalifəti”ni də həbs edə bilərlər. Lazımdırsa, mən də Bakıya gəlim — məni də zindana atın. Nə lazımdırsa edin, yetər ki, siyasi və iqtisadi islahatlara başlanılsın. Özü də təcili şəkildə.
Əks halda, yaxın vaxtlarda Azərbaycan vətəndaşları 5 manat qazanmaq üçün Ermənistana və Gürcüstana gedib hamballıq etməyə məcbur qalacaqlar. Vəziyyət bu qədər kritikdir.