Rusiyanın Moskva vilayətinin Arbitraj Məhkəməsi “Ximki” futbol klubunu müflis elan edib.
Bu barədə TASS agentliyi məlumat yayıb.
Klub iyunun 18-də fəaliyyətini dayandırıb. Daha əvvəl “Ximki” maliyyə çətinlikləri səbəbindən Rusiya Premyer Liqasının (RPL) cari mövsümündə iştirak etmək üçün lisenziya ala bilməyib.
“Ximki” 1997-ci ildə yaradılıb. Komanda ilk dəfə 2007-ci ildə yüksək diviziona yüksəlib.
Klubun RPL-də ən yüksək nailiyyəti 2021/22 mövsümündə səkkizinci yer olub. Bundan əlavə, “Ximki” iki dəfə Rusiya kubokunun finalına yüksəlib (2005 və 2020), 2006 və 2024-cü illərdə isə iki dəfə ölkənin ikinci divizionunun qalibi olub.
Qeyd edək ki, “Ximki” klubunun əvvəlki sahibi azərbaycanlı biznesmen Tufan Sadıqov olub.