2 avqust 2027-ci ildə Yer əsrin ən böyük kölgəsinə qərq olacaq – altı dəqiqədən çox davam edən tam Günəş tutulması Avropa, Afrika və Yaxın Şərqin bəzi hissələrini əhatə edəcək.
Tacxeber.com xəbər verir ki, 2027-ci il avqustun 2-də planet 21-ci əsrin ən parlaq astronomik hadisələrindən birini – 6 dəqiqə 22 saniyəyə qədər davam edəcək tam Günəş tutulmasını yaşayacaq. Bu, 2009-cu ildən 2114-cü ilə qədər quruda ən uzun tutulmadır. Hadisə artıq qeyri-rəsmi ad alıb – “Böyük Şimali Afrika Tutulması”.
Tutulma Avropanın cənubundan, Şimali Afrikadan və Yaxın Şərqdən görünəcək, ən yaxşı baxış şəraiti Misirin Luksor şəhərində müşahidə ediləcək və burada müşahidəçilər tutulmanın ən uzun müddətini görəcəklər. Tutulma Şimali Atlantikada başlayacaq, daha sonra İspaniyanın cənubundan, Cəbəllütariq, Mərakeş, Əlcəzair, Tunis, Liviya, Misir, Səudiyyə Ərəbistanı və Yəməndən keçərək Hind okeanında sona çatacaq. Ümumilikdə tədbiri təxminən 89 milyon insan görəcək.