Aleksandr Lukaşenko Belarus hərbi qulluqçularına vətəndaşlara qarşı silah tətbiq etməyə icazə verən fərman imzalayıb.
Tacxeber.com xəbər verir ki, bu barədə “Azadlıq” radiosunun Belarus xidməti məlumat yayıb.
Bildirilir ki, Lukaşenkonun fərmanı fevralın 1-də imzalanıb və fevralın 3-də dərc edilib.
Sənədə əsasən, hərbi qulluqçular onlara həvalə edilmiş tapşırıqları yerinə yetirərkən mövcud vəziyyəti, cinayətin xarakterini, inzibati xəta və hüquq pozuntusunu nəzərə alaraq fiziki qüvvədən, xüsusi vasitələrdən, döyüş və xüsusi texnikadan istifadə edə, silah tətbiq edə və istifadə edə bilərlər.
Sərəncamda o da qeyd olunur ki, vətəndaşlara atəş açmış hərbi qulluqçu yaralının sağlamlığına dəymiş ziyana görə məsuliyyət daşımır.
Bundan əlavə, atəş açan hərbçi, sənəddə qeyd olunduğu kimi, bu barədə dərhal istintaq orqanlarına məlumat verməli, həmçinin yaralılara ilkin tibbi yardım göstərməlidir.
