Tiflisdə həbs cəzasına məhkum edilmiş Gürcüstanın keçmiş prezidenti Mixail Saakaşvili hesab edir ki, Rusiya prezidenti Vladimir Putinin hakimiyyətinin sonuna cəmi bir neçə həftə qalıb. Kreml ağasının postunu nə qədər tez itirməsi Ukrayna ordusunun döyüş meydanındakı uğurundan asılıdır.
Tacxeber.com xəbər verir ki, bu barədə Saakaşvili “Facebook” səhifəsində yazıb.
“Mən Putini yaxşı tanıyıram, bu günlərdə ona baxıram və onun bu qədər isterik olduğunu xatırlamıram. İndi mənə aydın oldu ki, Putinin hakimiyyətdə olmasına həftələr qalıb”, – Gürcüstanın keçmiş lideri deyir.
Putinin isterik reaksiyasının əlaməti kimi Saakaşvili Kreml sahibi üçün Rusiya Federasiyasının ən geridə qalmış əyaləti olan Dağıstanda təşkil edilmiş “xalqın içinə getmə” kampaniyasını hesab edir.
Onun sözlərinə görə, tezliklə Rusiyada “böyük xaos” yaranacaq.
“Bunun nə qədər tez baş verəcəyi əsasən Ukraynanın döyüş meydanında irəliləməsindən asılıdır. İrəliləyiş davam edir. Ukraynalılar yaxın həftələrdə Baxmutu geri qaytaracaq, sentyabrda minimum Azov dənizinə çatacaq və Krıma girməyə başlayacaq. Ukraynanın Krıma girməsi isə Putin üçün sondur”, – deyə Saakaşvili vurğulayıb.
