Amerikanın “Axios” portalı və İsrail televiziyasının “Channel 12” telekanalı iddia edir ki, Türkiyə, Misir və Pakistan hazırda İran və ABŞ arasında vasitəçi kimi çıxış edir.
“Amerika mənbələrinə görə, son iki gündə Türkiyə, Misir və Pakistan tərəfindən gərginliyin azaldılmasını təmin etmək məqsədilə ABŞ və İrandan mesajlar ötürülüb”, – deyə Axios portalı və İsrailin 12-ci kanalının müxbiri Barak Ravid X-də yazıb.
Aldığı məlumata görə, “bu üç ölkənin yüksək vəzifəli rəsmiləri Ağ Evin nümayəndəsi Stiv Vitkov və İranın xarici işlər naziri Abbas Əraqçi ilə ayrıca danışıqlar aparıblar”. “Vasitəçilik davam edir və irəliləyiş əldə edilir. Müharibənin bitməsi və qalan bütün məsələlərin həlli müzakirə olunur. Ümid edirik ki, tezliklə cavab alacağıq”, – adı açıqlanmayan mənbə Ravidə bildirib.