Ermənistan İrandan respublikaya maye qazın tədarükü üçün kvota istəyib, bu barədə jurnalistlərə ölkənin iqtisadiyyat naziri Gevorq Papoyan bildirib, RİA Novosti xəbər verir.
İyun ayından Ermənistanda yanacaqdoldurma məntəqələrində maye qazın qiyməti 1,5 dəfə artıb. Bundan əvvəl Papoyan respublikanın iqtisadi rəqabətin müdafiəsi komissiyasını qiymət artımının səbəbini öyrənməyə çağırıb. Səbəblərdən biri, hakimiyyət orqanlarının dediyinə görə, Rusiya Federasiyasından yanacaq idxal edərkən Gürcüstan sərhədində yaranan problemlərdir.
“Mən həmkarım, İranın sənaye, mədən və ticarət naziri ilə görüşdüm və xahiş etdim ki, bizə maye qaz üçün kvota ayrılsın”, – nazir bildirib. Onun sözlərinə görə, bu, tədarükün şaxələndirilməsi baxımından vacibdir. “Bu, rəqabəti artıracaq və qiymətlərin aşağı düşməsinə kömək edəcək”, – Papoyan vurğulayıb.