Tehranda Ermənistanın İrana düşmən qüvvələrin fəaliyyət mərkəzinə çevrildiyi qənaəti yaranır.
Tacxeber.com bildirir ki, news.am saytının məlumatına görə, bu barədə İranın Ermənistandakı səfiri Xəlil Şirqolami mətbuat konfransında bildirib.
“Bir qrup insanın Ermənistandakı İran səfirliyinin binasına gəlmək və hörmətsiz və təhqiramiz ifadələr işlətmək imkanı var və onlara icazə verilir.
Şikayətimizə baxmayaraq, altı gündür ki, saat 18:00-dan 21:00-dək Ermənistandakı İran səfirliyinin qarşısında hörmətsiz və təhqiramiz ifadələr səsləndirilir və bu proses davam edir. Şikayətimizi dəfələrlə müvafiq Ermənistan hakimiyyət orqanlarına təqdim etmişik. Ən çətin dövrlərdə Ermənistan hökumətinin yanında olmuşuq; buna çoxsaylı nümunələr var. Hazırda çətin vəziyyətdəyik və İranın Ermənistandakı səfirliyinin xaricində baş verənlər İran xalqının tarixi yaddaşında qalacaq. Düşünürəm ki, hər şeyi aydınlaşdırdım”, – deyə Şirqolami qeyd edib.
Onun sözlərinə görə, çoxları İranda qeyri-sabitliyi və ölkəni parçalamaq məqsədi ilə separatçı qüvvələrin fəallaşmasını gözləyirdi.
Səfir əlavə edib ki, “İsrailin əvvəldən planlaşdırdığı şey məhz budur. Onlar uğur qazana bilməyəcəklər, amma uğur qazansalar, Ermənistan uduzanlardan biri olacaq. İnanıram ki, bu ideyanın əlavə izahata ehtiyacı yoxdur”.