Ukrayna hakimiyyəti Donbasdan qoşunların qarşılıqlı çıxarılması və orada azad iqtisadi zonanın yaradılması məsələsini referenduma çıxarmağa hazırdır.
Tacxeber.com bildirir ki, bu barədə prezident Volodimir Zelenski Fox News-a verdiyi müsahibədə deyib: “(Qərar verilərsə), biz bir neçə kilometr geri çəkilməli olacağıq. Rusiya da geri çəkilməli olacaq”, – deyə Zelenski bildirib. “Bu azad iqtisadi zonanın müəyyən qaydaları olacaq. Referendum isə onu yaratmaq və ya yaratmamaq barədə qərar vermək üçün bir yoldur.”
Volodimir Zelenski vurğulayıb ki, Ukrayna referendumun təsdiqi olmadan əraziləri güzəştə gedə bilməz, çünki hakimiyyətin belə bir səlahiyyəti yoxdur – yalnız bütövlükdə əhali. Lakin o, ukraynalıların referendumda bu təklifi dəstəkləməyəcəyinə inanır.
Ukrayna prezidenti həmçinin müsahibəsində Kiyevin hazırladığı 20 maddəlik sülh planının Qərb tərəfdaşları ilə demək olar ki, 100% razılaşdırıldığını bildirib. O, əlavə edib ki, ərazi bəndi problemli məsələ olaraq qalır.