Tramp üçün Putinə açıq dəstək vermək son dərəcədə çətindir və söhbət ilk növbədə Avropa, ABŞ və ələlxüsus respublikaçılar arasında hökm sürən ictimai rəydən gedir. Məhz ictimai rəyin birmənalı olaraq Ukraynanın tərəfində olduğuna görə, Tramp artıq Rusiyaya açıq dəstəkdən və Ukraynaya təzyiqlərdən yayınır, amma dolayısı yolla “dost Vladimiri” tək qoymamağa çalışır.
Nə baş verib?
Diplomatik prosesin son dərəcə intensiv getdiyi bir vaxtda Tramp Putinə informasiya müharisində yardım etmək qərarına gəldi və Putinlə Corc Buş arasında aparılmış danışıqların stenoqramlarını məxfilikdən çıxartdı.
2001-ci ildə Putin Corc Buşla söhbət zamanı Ukraynanın NATO-ya üzv olmasının Rusiya ilə ABŞ arasında münaqişə meydanı yaradacağını və uzunmüddətli qarşıdurmaya səbəb olacağını demişdi.
Putin hələ o zaman Ukraynanın “süni dövlət” olması və Ukrayna əhalisinin “1/3 ruslardan ibarət olması” barədə fantaziyaları irəli sürürdü.
Bu stenoqramlarda yeni və ya gizli heç nə yoxdur, lakin onların məhz indi dərc olunması təsadüfi deyil. Tramp bu yolla uzun müddət səsləndirdiyi tezisə haqq qazandırır: əgər Ukrayna Baydenin dəstəyi ilə NATO-ya doğru getməsəydi, müharibə də olmazdı, bu müharibə Zelenski və Baydenin müharibəsidir.
Beləliklə, Tramp Ukraynaya təzyiqi artırır: əgər siz özünüz günahkarsınızsa, deməli, daha böyük güzəştlərə getməlisiniz.