Axios xəbər verir ki, ABŞ Ukrayna prezidenti Vladimir Zelenskiyə təzyiqləri artırır, onun prezident Donald Trampın sülh planı çərçivəsində ərazi və digər güzəştlərə tez razılıq verməsini istəyir. Nəşrin yazdığına görə, Kiyev və Vaşinqton arasında danışıqlar iki əsas məsələ üzərində cəmlənib: Moskvanın bütün Donbası, o cümlədən Rusiyanın hərbi nəzarəti altında olmayan əraziləri vermək tələbi və Ukraynanın ABŞ-dan ciddi təhlükəsizlik zəmanəti istəməsi.
Ukrayna rəsmiləri Vaşinqtonun mövqeyinin Kremldə Trampın məsləhətçiləri Steve Witkoff, Jared Kushner və Vladimir Putin arasında baş tutan beş saatlıq görüşdən sonra sərtləşdiyini iddia edirlər. Mənbənin sözlərinə görə, sonrakı iki saatlıq danışıq zamanı Kuşner və Vitkoff “Zelenskidən qəti “hə” istəyiblər” və Kiyevi Rusiyanın Donbası tamamilə ələ keçirmək niyyətində olduğuna inandırıblar.
Ukrayna tərəfi vurğulayır ki, yenilənmiş Amerika təklifi qismən görüşə cəmi bir saat qalmış təqdim edilib, Vaşinqton isə sənədlərin bir gün əvvəl təhvil verildiyini təkid edir. Axiosun sözlərinə görə, yeni şərtlər ərazi və Zaporojjya Atom Elektrik Stansiyasına nəzarətlə bağlı daha sərt tələbləri ehtiva edir, lakin təhlükəsizlik zəmanətləri ilə bağlı dəqiq cavab vermir.
Ukrayna rəsmiləri qeyd edir ki, ABŞ Zelenskidən əsas məsələləri – kimin qoşunları çıxarmalı, Rusiya tərəfindən mümkün hərbi əməliyyatların bərpasının qarşısını necə almalı və hansı nəzarət mexanizmlərinin tətbiq ediləcəyi barədə ətraflı müzakirə aparmadan razılaşacağını gözləyir.