Rusiya prezidenti Vladimir Putin ölkənin nüvə sənayesinin mərkəzi və ilk sovet atom bombasının “vətəni” olan Sarova səfər edib və burada onun rəsmi cədvəlinə daxil olmayan qapalı iclas keçirib.
Tacxeber.com bildirir ki, bu barədə Rusiya dövlət başçısını müşayiət edən “Kommersant”ın jurnalisti Andrey Kolesnikov məlumat verib.
Kolesnikovun sözlərinə görə, görüşdə Putinin 2018-ci ildə elan etdiyi “Burevestnik” nüvə raketinin sınaqdan keçirilməsi müzakirə olunub. Əsas məsələlərdən biri raketin 2025-ci ildə istifadəyə verilməsi ehtimalı ilə bağlı olub.
Maraqlıdır ki, gizli görüş “Novaya Zemlya”da “Burevestnik”in sınaqlarından bir neçə gün sonra baş tutub. Qərb ölkələrindən birinin kəşfiyyat xidmətindəki mənbə Reuters agentliyinə məlumatı təsdiqləyib.
Pankovo poliqonunda sınağın necə başa çatdığı hələ məlum deyil.
2020-ci ilin yayında ABŞ-ın silahlara nəzarət üzrə xüsusi nümayəndəsi Marşall Billinqsli Moskvanı bu raketin təhlükəli sınaqlarını dayandırmağa çağırıb. Senatda çıxış edən Billinqs bunu “uçan Çernobıl” adlandırıb. Çünki raket uçuş zamanı radiasiya izi saxlaya bilən nüvə yanacağından istifadə edir və mümkün qəza ərazinin ciddi çirklənməsi ilə nəticələnir.