Son zamanlar Rusiya Ukraynaya qarşı pilotsuz uçuş aparatları – xüsusilə də “Şahed” tipli kamikadze dronlarla hücumlarını artırıb. Ukraynalı hərbi ekspertlər bu cihazların yeni, daha sürətli – şərti olaraq “reaktiv Şahedlər” adlandırılan – versiyalarından istifadə edildiyini bildirirlər.
Hərbi ekspert Oleq Katkovun sözlərinə görə, bu hücumlar daha sürətli və ani xarakter daşıyır. Onun fikrincə, Rusiya bu yeni modifikasiyalı dronları “Shahed-238” kimi təkmilləşdirib və onların sayı hələlik məhduddur.
Ekspert qeyd edir ki, reaktiv mühərriklərlə təchiz olunmuş “Shahed”lər adi versiyalardan daha çətin aşkar olunur və onlara qarşı mübarizə aparmaq daha çətindir. Bu isə Ukraynanın hava hücumundan müdafiə sisteminə əlavə çətinliklər yaradır.
Ukrayna Müdafiə Qüvvələri bildirirlər ki, hazırda reaktiv “Shahed”lərin sayı məhdud olsa da, onların istifadəsi artarsa, bu yeni təhlükə səviyyəsi yarada bilər.
Ukrayna tərəfi havadan müdafiəni gücləndirmək üçün Qərb ölkələrindən daha müasir texnologiyalar və dəstək gözləyir.