Çin Xalq Respublikasının Mançesterdəki Baş Konsulluğunun ərazisində Honq-Konqdan olan fəal döyüldükdən sonra altı çinli diplomat Britaniyanı tərk edəcək.
Bu barədə Böyük Britaniyanın xarici işlər naziri Ceyms Kleverli bildirib.
Onun sözlərinə görə, Britaniya Xarici İşlər Nazirliyi Çin hökumətindən çinli diplomatların Britaniya polisi tərəfindən sorğu-sual oluna bilməsi üçün onların diplomatik toxunulmazlıqlarını ləğv etməyi xahiş edib. Son tarix dekabrın 14-nə təyin edilib.
“Bizim sorğumuza cavab olaraq Çin hökuməti baş konsulun özü də daxil olmaqla, bu rəsmi şəxsləri Böyük Britaniyadan çıxardı”, – deyə Kleverli bildirib.
Çinin baş konsulunun özü Britaniya televiziyası ilə söhbətində fəalı döymədiyini qeyd edib, lakin etiraf edib ki, kişi onun ölkəsini və rəhbərliyini təhqir etdiyi üçün onun saçından dartıb.
“Düşünürəm ki, bu mənim vəzifəm idi”, – deyə Sky News diplomatdan sitat gətirib. (Publika.az)
