Bu gün KXDR-in buraxdığı qitələrarası ballistik raket Yaponiyanın eksklüziv iqtisadi zonasına düşüb.
Yenisabah “Interfax”a istinadla xəbər verir ki, bu barədə Yaponiya Müdafiə Nazirliyi məlumat yayıb.
Ballistik raket (ICBM) atışını Cənubi Koreya Silahlı Qüvvələrinin Birləşmiş Qərargah Rəisləri (JCS) də təsdiqləyib. Cənubi Koreya ordusu qeyd edib ki, raket Pxenyan yaxınlığındakı Sunan məntəqəsindən şərqə doğru buraxılıb.
O, təxminən 1000 km uçub, maksimum 6100 km yüksəkliyə çatıb.
Yaponiyanın baş naziri Fumio Kişida Şimali Koreyanın bu addımını pisləyib və belə tez-tez baş verən təxribatlara dözə bilməyəcəyini deyib.
O əlavə edib ki, hələlik dağıntılar barədə məlumat yoxdur.
