Dekabrın 25-də vəkil Nemət Kərimli Daxili İşlər Nazirliyinin (DİN) İnzibati həbs olunanların saxlanma məntəqəsində NİDA Vətəndaş Hərəkatının və III Platformanın üzvü Araz Əliyev ilə görüşüb.
Tacxeber.com xəbər verir ki, bu barədə vəkil “Turan”a danışıb.
N. Kərimli bildirib ki, A.Əliyevin sözlərinə görə, onu dekabrın 23-də axşam saatlarında mülki geyimli şəxslər yolda saxlayıblar:
“Araz Əliyev deyir ki, onu saxlayıb maşına mindirəndə o, fiziki təzyiqə məruz qalıb, kompüterini əlindən alıblar. Daha sonra onu 24-cü polis bölməsinə aparıblar, orada ona hədə-qorxu gəliblər”.
A.Əliyev ittihamları qəbul etmir və öz həbsini III Platformanda fəaliyyəti ilə əlaqələndirir.
Bu deyilənlərə, hələlik, DİN-dən münasibət öyrənmək mümkün olmayıb.
Xatırladaq ki, A. Əliyevlə dekabrın 23-ü saat 18 radələrindən əlaqə kəsilib. Bir gün sonra, dekabrın 24-də isə onun saxlanıldığı və Nizami Rayon Məhkəməsində haqqında 25 sutka inzibati həbs qərarı çıxarıldığı məlum olub.