Məktubda deyilir:
“Hörmətli cənab Prezident!
Biz, Azərbaycan Respublikasının vətəndaş cəmiyyəti təşkilatlarının nümayəndələri, ilk növbədə sizə dərin hörmətimizi bildiririk.
İşğaldan azad edilmiş doğma Xankəndinizə və hər bir Azərbaycanlı üçün əziz olan Şuşa şəhərinə səfərinizi, Azərbaycana göstərdiyiniz xoşməramlılığı, Azərbaycanla İran arasında mehriban qonşuluq münasibətlərinə verdiyiniz önəmi, eləcə də Azərbaycan Prezidenti, qalib Ali Baş Komandan cənab İlham Əliyevlə qarşılıqlı hörmət, etimad və səmimiyyətə əsaslanan münasibətlərinizi yüksək qiymətləndiririk.
QHT nümayəndələri qeyd ediblər ki, Pezeşkian həkim kimi onlarla Azərbaycan xəstəsini əməliyyat edib və onlara böyük diqqət və qayğı göstərib:
“Xalqa xidmət etmək istəyiniz, eləcə də ictimai xadim kimi vətəndaş mövqeyiniz Azərbaycan xalqının sizə olan rəğbətini daha da artırıb”.
Məktubda qeyd olunur ki, İran Prezidentinin Azərbaycan dilinə, milli və mənəvi dəyərlərinə, Azərbaycan xalqının zəngin ədəbi irsinə olan sevgisi və hörməti yüksək tərifə layiqdir:
“Çıxışlarınızda ana dilində şeir söyləməyiniz, Azərbaycan atalar sözlərindən sitatlar gətirməyiniz, ailə üzvlərinizlə ana dilində ünsiyyət qurmağınız və buna sadiq olduğunuzu qürurla nümayiş etdirməyiniz əvəzsizdir.”
Bütün bunlar onu göstərir ki, sizin üçün Azərbaycan dili sadəcə ünsiyyət vasitəsi deyil, həm də mənəvi kimliyinizin, tarixi yaddaşınızın və milli kimliyinizin ayrılmaz hissəsidir.
Məhz bu baxımdan inanırıq ki, dövlət başçısı olaraq, ana dilinin insan həyatındakı müstəsna əhəmiyyətini qəbul edərək, İranda yaşayan milyonlarla azərbaycanlının ana dilində təhsil almaq istəyinə xüsusi diqqət yetirəcəksiniz.
Biz inanırıq ki, İranda həyatın ictimai-siyasi, iqtisadi, mədəni və digər sahələrində həmişə mühüm rol oynamış Azərbaycanlılar üçün ana dilində təhsil imkanları təmin etmək üçün tarixi addımlar atmağın vaxtı gəlib çatıb.
QHT nümayəndələri bildiriblər ki, bu gün bu tarixi irsin layiqli davamçıları olan milyonlarla insanın ana dilini qorumaq, inkişaf etdirmək və gələcək nəsillərə ötürmək imkanlarının genişləndirilməsi həm mənəvi məsuliyyət, həm də tarixi ədalət məsələsidir.
“Sizdən xahiş edirik ki, İranda yaşayan azərbaycanlıların ölkə Konstitusiyasında təsbit edildiyi kimi, ana dilində təhsil almaq imkanını təmin etmək üçün qətiyyətli və praktik tədbirlər görmək təşəbbüsünü şəxsən göstərəsiniz.
Biz hesab edirik ki, bu məqsədə çatmaq üçün məktəblərdə Azərbaycan dilinin sistemli tədrisini təşkil etmək, Azərbaycan dilində tədris aparan orta və ali təhsil müəssisələri yaratmaq, müvafiq müəllim heyətinin hazırlanmasını, dərsliklərin və təhsil proqramlarının hazırlanmasını, bu sahədə zəruri hüquqi və institusional mexanizmlərin formalaşdırılmasını təmin etmək lazımdır.
Əminik ki, belə bir təşəbbüs milyonlarla insanın uzun müddətdir ki, arzuladığı arzuları gerçəkləşdirməklə yanaşı, İranın mədəni müxtəlifliyə və ədalət və bərabərliyə olan sadiqliyinə verdiyi dəyərin parlaq nümunəsinə çevriləcək.
Məktubda deyilir: “Ana dilində təhsil almaq üçün imkanlar yaratmaq millətin keçmişinə hörmət əlaməti, bu günün dəyərini tanımaq və gələcəyinə ən dəyərli töhfədir”.
Azərbaycan QHT-ləri inanırlar ki, sizin prezidentliyiniz dövründə bu istiqamətdə atılan tarixi addımlar milyonlarla azərbaycanlının yaddaşında silinməz iz buraxacaq və həmişə minnətdarlıqla xatırlanacaq:
“Biz, Azərbaycan vətəndaş cəmiyyətinin nümayəndələri, bu nəcib missiyanın həyata keçirilməsi, ana dilində təhsilin inkişafı və elmi, pedaqoji və mədəni əməkdaşlığın genişləndirilməsi üçün imkanlarımız daxilində hərtərəfli dəstək göstərməyə hazır olduğumuzu bəyan edirik.”
Bu məktubu yazarkən, sizin də həmişə böyük sevgi və hörmətlə xatırladığınız, Azərbaycan və İranın böyük söz ustası Məhəmməd Hüseyn Şəhriyarın ana dilimizə həsr etdiyi ölməz sətirləri dərin duyğularla xatırlayırıq.
İnanırıq ki, ana dilinə böyük sevgi bəsləyən bir prezident kimi, bu tarixi missiyanın həyata keçirilməsinə layiqli töhfə verəcəksiniz.”
Açıq məktub 55 QHT adından göndərilib.