ABŞ prezidenti Donald Tramp “The Financial Times” qəzetinə verdiyi müsahibədə İran neftini “ələ keçirmək” istədiyini bildirib.
“Düzünü desəm, mənim ən sevdiyim seçim İran neftini götürməkdir, amma ABŞ-dakı bəzi axmaq insanlar deyirlər ki, ‘Bunu niyə edirsiniz?’ Amma onlar axmaq insanlardır”, – deyə Amerika lideri bildirib.
O, İranın Fars körfəzinin şimalındakı əsas neft ixrac mərkəzi olan Xarq adasını ələ keçirməyi istisna etməyib. Tramp hesab edir ki, İslam Respublikasının adanı müdafiə etmək gücü çatmır və ABŞ onu “çox asanlıqla” ələ keçirə bilər.
ABŞ lideri qeyd edib ki, Amerika silahlı qüvvələri Yaxın Şərqdəki hərbi əməliyyatlar zamanı artıq “13.000 hədəfi bombalayıb” və hələ də təxminən 3.000 hədəf qalıb.