Vaxt var idi Qərb Zelenskini demokratiyanın simvolu, müasir dövrün qəhrəmanı kimi təqdim edirdi – jurnalların üz qabığında, parlamentlərin tribunalarında alqışlanırdı. Bu gün isə eyni dairələrdə artıq suallar verilir: gedən milyardlar hara xərclənir, kimlər qazanc əldə edir və bu müharibə nə vaxta qədər davam edəcək?
Alman deputatı Alice Weidel, Macarıstanın baş naziri Viktor Orban, ABŞ senatoru Rand Paul, Konqres üzvü Marjorie Taylor Greene və Slovakiyanın baş naziri Robert Fico artıq açıq şəkildə sərt ittihamlar irəli sürürlər.
Dünən toxunulmaz sayılan fiqur bu gün açıq şəkildə tənqid hədəfinə çevrilib. Tarix boyu belə olub: maraqlara uyğun gələndə qəhrəman yaradırlar, maraqlar dəyişəndə isə eyni adamı günah keçisinə çevirirlər.
Əslində məsələ tək bir şəxsdə deyil. Söhbət böyük pullardan, silah sənayesindən, geosiyasi oyunlardan və xalqların taleyinin biznesə çevrilməsindən gedir. Qəhrəman obrazı da, “oğru” damğası da çox vaxt həqiqətdən yox, siyasi ehtiyacdan doğur.
Yəni bu dəyişən münasibət beynəlxalq siyasətdə göstərir ki, dostluq da, düşmənçilik də daimi deyil – daimi olan yalnız maraqlardır.
Bütün bu oyunlardan əziyyət çəkənlər isə siravi insanlardır, xalqlardır.
