Erməni mövqelərindəki reallıq getdikcə absurda çevrilən bir teatr səhnəsini xatırladır. Bu “tamaşanın” yeni pərdəsi Azərbaycanın Laçın rayonu istiqamətində baş verib.
Tacxeber.com xəbər verir ki, Caliber.Az bu barədə redaksiyasına daxil olan görüntüləri təqdim edib.
Kadrlardan aydın şəkildə görünür ki, Ermənistan ordusunun hərbçisi müşahidə məntəqəsini tərk edərək möhkəmləndirilmiş səngərin qarşısındakı təpəyə qalxır və… Azərbaycan Ordusunun mövqelərinə daş atmağa başlayır.
Görünür, bu cür “atma hücumları” artıq erməni təxribatçılarının yeni “taktikası”na çevrilib.
Üstəlik, bu son vaxtlar baş verən ilk belə hadisə deyil. Xatırladaq ki, mayın 9-da saat 17:40-da oxşar bir səhnə Naxçıvan Muxtar Respublikası istiqamətində yerləşən döyüş mövqelərindən birində yaşanmışdı. Həmin vaxt erməni hərbçisi səngərin üzərində dayanaraq qeyri-etik ifadələr səsləndirir, hədələyir və Azərbaycan hərbçilərini cavab verməyə təhrik etməyə çalışırdı.
Lakin Ermənistan komandanlığının bu hesablamaları növbəti dəfə iflasa uğradı. Azərbaycan hərbçiləri soyuqqanlılıq və peşəkarlıq nümayiş etdirərək vəziyyəti diqqətlə izləsələr də, ucuz təxribatlara uymadılar.