Ermənistanın Baş naziri Nikol Paşinyan Cənubi Qafqazda sülhə verdiyi töhfəyə görə Azərbaycan Prezidenti İlham Əliyevə minnətdarlığını bildirib. Paşinyan bu açıqlamanı Hessen Sülh Mükafatının təqdimetmə mərasimində verib.
“Mən həmçinin bu mükafata layiq olan Azərbaycan Prezidenti İlham Əliyevə minnətdarlığımı bildirmək istəyirəm”, – deyə Paşinyan bildirib.
O, həmçinin Ermənistan və Azərbaycan xalqlarına sülh prosesinə göstərdikləri dəstəyə görə təşəkkür edərək, münaqişənin nəticələrinə baxmayaraq, indiki və gələcəyi dəyişdirməyin zəruriliyini başa düşdüklərini qeyd edib.
Paşinyanın sözlərinə görə, sülhün bərqərar olması üçün əsas onun və İlham Əliyevin 8 avqust 2025-ci ildə Vaşinqton sammitində qəbul etdiyi və ABŞ prezidenti Donald Trampın iştirakı ilə imzaladığı birgə bəyannamə olub.
Ermənistanın Baş naziri həmçinin xatırladıb ki, 2024-cü ildə ölkələr dövlət sərhədinin delimitasiyası və demarkasiyası üzrə komissiyaların birgə fəaliyyətini tənzimləyən qaydaları imzalayıb və təsdiqləyiblər. Sənəddə prosesin əsas prinsipi kimi 1991-ci il Alma-Ata Bəyannaməsi təsbit edilib.
“Bu o deməkdir ki, Ermənistan və Azərbaycan iki sovet respublikasının ərazilərinə uyğun olaraq bir-birinin ərazi bütövlüyünü və suverenliyini tanıyırlar”, – deyə Paşinyan bildirib.
O əlavə edib ki, bu prinsip həmçinin Ermənistan və Azərbaycan arasında sülhün və dövlətlərarası münasibətlərin qurulması haqqında müqavilədə də təsbit olunub və iki ölkənin xarici işlər nazirləri bu müqaviləni Vaşinqton sammiti zamanı paraflayıblar.
Paşinyan müqavilənin paraflanmasını və birgə bəyannamənin qəbul edilməsini Ermənistan və Azərbaycan arasındakı münasibətlərdə tarixi irəliləyiş adlandırıb.