Omanın xarici işlər naziri Bədr əl-Busaidi CBS News-a verdiyi müsahibədə bildirib ki, İran ABŞ ilə danışıqlar zamanı bütün zənginləşdirilmiş uran ehtiyatlarından imtina etməyə razı olub.
Onun sözlərinə görə, bu, Vaşinqtonun İranın nüvə proqramı ilə bağlı razılığa gəlməsi üçün Tehrana qarşı əsas tələblərindən biridir.
Əl-Busaidi qeyd edib ki, “Mövcud ehtiyatlarla bağlı, inanıram ki, artıq onların mümkün olan minimum səviyyəyə – neytral, təbii səviyyəyə qədər emal ediləcəyi barədə razılığa gəlinib. Yəni, onlar yanacağa çevriləcək və bu yanacaq geri dönməz olacaq”.
Nazir həmçinin əlavə edib ki, İran MAQATE müfəttişlərinə nüvə obyektlərinə giriş imkanı verməyə razılıq verib. O, ABŞ və İran arasında razılaşmanın əldə edilə biləcəyini, lakin “bəzi detalları dəqiqləşdirmək üçün bir az daha vaxta ehtiyac olduğunu” bildirib.
“The Wall Street Journal” qəzeti əvvəllər xəbər vermişdi ki, danışıqlar zamanı ABŞ İrandan Fordo, Nətənz və İsfahandakı nüvə obyektlərini sökməyi, eləcə də ölkədən bütün zənginləşdirilmiş uranı çıxarmağı tələb edib. Bu arada, İran Hökumətinin İnformasiya Şurasının rəhbəri Elias Həzrəti Tehranın “heç nəyi çıxarmayacağını” və “ölkənin ehtiyaclarına uyğun olaraq” uranı zənginləşdirməyə davam edəcəyini bildirib.