Respublika Perinatal Mərkəzində 7 körpənin ölümü ilə nəticələnən yanğınla bağlı məhkəmə prosesi davam edir.
Təqsirləndirilən keçmiş direktor Mehriban Abasquliyeva məhkəmədə deyib ki, yanğın siqnalizasiya sistemindəki problem səbəbindən baş verib:
“Yanğın təhlükəsizliyi ilə bağlı problem, siqnalizasiyanın olmaması barədə TƏBİB-ə yazılı məlumat vermişdim. Ancaq onlardan vəsaiti ala bilmədik ki, problemi həll edək”.
Abasquliyeva qeyd edib ki, mərkəzdə ciddi texniki çatışmazlıqlar olub:
“Qazanxanada problem vardı, isti su gəlmirdi. Havalandırma, generator sistemi işləmirdi. Bunları öz hesabıma təmir etdirmişəm. 6 min 500 manat maaşımın 3 min 500 manatını mərkəzin işlərinə xərcləyirdim”.
Keçmiş direktor bildirib ki, bu problem ondan əvvəlki rəhbərlik dövründə də mövcud olub və sonra da həllini tapmayıb:
“Çünki dam açılmalı, elektrik xətləri yenidən çəkilməli idi. Dam da, xətlər də yararsız vəziyyətdə idi. Lakin TƏBİB-dən maliyyə ala bilmədik”.
Növbəti məhkəmə iclası martın 4-nə təyin edilib. (HamamTimes)