İsrailin Baş naziri Benyamin Netanyahunun Qərbi Qüdsdə yerləşən ofisinə göndərilən şübhəli paket təhlükəsizlik orqanlarını hərəkətə keçirib. Hadisə ilə bağlı əraziyə bomba zərərsizləşdirmə üzrə mütəxəssislər və mobil kriminal laboratoriya əməkdaşları cəlb olunub.
İsrail mətbuatının yaydığı məlumata görə, ofisə çatdırılan zərf şübhəli hesab edildikdən sonra təhlükəsizlik protokolu işə salınıb. “Maariv” qəzetinin xəbərinə əsasən, zərfin içərisində mənbəyi və tərkibi məlum olmayan ampullar aşkar edilib. Paket əlavə ekspertiza üçün Nes Ziona şəhərində yerləşən bioloji laboratoriyaya göndərilib.
Baş nazirlik Ofisinin Təhlükəsizlik və Fövqəladə Hallar Bölməsi bildirib ki, şübhəli əlamətlər daşıyan zərf qəbul edilərək protokola uyğun şəkildə araşdırılıb və proses başa çatdırılıb. Açıqlamada əməkdaşların təhlükə ilə üzləşmədiyi vurğulanıb.
İsrail polisi ilkin baxış zamanı partlayıcı maddə aşkar etmədiyini açıqlayıb. Hadisə zamanı ofis ətrafında təhlükəsizlik tədbirləri gücləndirilib, polis avtomobillərinin sayı artırılıb.
Bu hadisə son aylarda Baş nazirlik Ofisinə göndərilən üçüncü şübhəli zərf kimi qeydə alınıb. 2025-ci ilin aprel və noyabr aylarında da oxşar hallarla bağlı araşdırma aparılsa da, təhlükəli maddə tapılmayıb.