Venesuela lideri Nikolas Maduro dünən gecə ABŞ ordusunun elit xüsusi təyinatlı qüvvələri Delta Force-un üzvləri tərəfindən saxlanılıb.
Bu barədə CBS News-a ABŞ administrasiyasındakı mənbələr məlumat verib. Şəbəkənin məlumatına görə, əməliyyat ABŞ-ın Venesuela siyasi rejiminə qarşı daha genişmiqyaslı səylərinin bir hissəsi olub.
Delta Force ABŞ ordusunun xaricdə gizli əməliyyatlar aparmaq üçün əsas xüsusi təyinatlı qüvvələr bölməsi hesab olunur. Bölmə yüksək təhlükəsizlik hədəflərini ələ keçirmək, terrorçu liderləri məhv etmək və maksimum məxfilik şəraitində fəaliyyət göstərməkdə ixtisaslaşıb.
Maduronun saxlanılması Ağ Ev və ya Pentaqon tərəfindən rəsmi təsdiqlənməyib. Venesuela hakimiyyəti də Maduro və həyat yoldaşının tutulması ilə bağlı xəbərlərə münasibət bildirməyib.