“Azərbaycanda ən sevdiyim məsələlərdən biri rəsmi statistikada “eşələnməkdir”, rəqəmləri sevən, rəqəmlərlə işləməyi bacaranlar üçün istənilən kitabdan, kinodan, konsertdən daha əyləncəli bir məşğuliyyətdir”.
Tacxeber.com xəbər verir ki, bunu REAL Partiyasının sədri, tanınmış iqtisadçı Natiq Cəfərli sosial şəbəkə hesabında yazıb.
“Rəsmi xəbər, statistik məlumat: Bu ilin yanvar-oktyabr aylarında Azərbaycanda 25 463 ədəd notbuk istehsal edilib. Təkcə oktyabrda isə 24 033 ədəd notbuk istehsal edilib ki, bu da 1 il əvvələ nisbətən 3 433 dəfə (bir daha, DƏFƏ) çoxdur.
Keçək tərcüməyə. Hökumətin rəsmi qurumu deyir ki, bu ilin, yəni, 2025-ci ilin yanvar-sentyabr aylarında, ilk 9 ayda cəmi 1430 notbuk istehsal olunub. Birdən nəsə baş verib, möcüzə olub və oktyabr ayında 24033 ədəd notbuk istehsal ediblər (kim edib, necə edib – bunu demirlər). Onu da qeyd ediblər ki, məsələn, 2024-cü ilin oktyabr ayında cəmi 7 ədəd (bəli-bəli, yeddi ədəd) notbuk istehsal edilibmiş, bu ilin oktyabrında birdən-birə bu rəqəm 24033 ədəd olub. Yaxşı, oktyabrda yeni müəssisə açılıbmı – yox, oktyabrda hardasa qırmızı lent kəsilibmi – yox, bəs bu nə möcüzədir?! Bu notbukları kim və harada istehsal edir? Yoxsa bu sahə də avtomobil kimidir – hansısa ağıllı, arxalı oğlan Çindən notbukun korpusunu ayrı, batareykasını ayrı gətirib, burada birləşdirib adını istehsal qoyub?! Məntiqlə, oktyabrda 24033 ədəd kompyuter istehsal edilibsə, bu sahədə onlarla yeni iş yeri yaranmalı, yeni müəssisələr açılmalı idi, axtarın-görün belə bir məlumat qarşınıza çıxacaqmı?!
Azərbaycanda “vintaçanla istehsal modeli” çoxdan var, sadəcə bu notbuk işində “barıtını” çox ediblər, ya da, kaş ki, mən yanılım, çıxsınlar desinlər ki, səhv edirsiz, bu istehsaldı, özümüz komponentlər istehsal edirik, çip düzəldirik, zavodumuz bu, işçi sayımız bu qədərdir. Ölkədə “Kür” adlı bir müəssisə var idi, son məlumata görə orada istehsal çoxdan dayanmışdı, cəmi 2 işçi qalmışdı, onlardan da biri qarovulçu idi. Çox güman, elə həmin qarovulçu vintaçanla da işləməyi bacaran olub, korpusa batareykaları bağlayıb, digər işçi də də onları qutulara yığıb, adını da qoyublar istehsal.
“Keçmişdə zavodun 100-dən artıq işçisi olub, hazırda isə işçilərin sayı 2-yə bərabərdir. Zavod bağlanmayıb, yalnız istehsal dayanıb. 2018-ci ildə özəlləşdirilib. Yeni sahibi hələ ki, fəaliyyəti bərpa etməyib”, — deyə zavodun keçmiş direktoru Rizvan Osmanov bir neçə il öncə bildirib”, – N. Cəfərli yazıb.
