Son 10 ildir ki, bütün rəsmi, qeyri-rəsmi görüşlərdə, publik çıxışlarımda ən çox toxunduğum problemlərdən biri kiçik sahibkarlar, sadələşdirilmiş vergi ödəyiciləri üçün ƏDV-dən azad dövriyyənin artırılması olub.
2006-ci ildə, 1 dollar 78 qəpik olan zamanlarda sadələşdirilmiş vergi ödəyiciləri üçün ƏDV-yə cəlb olunmayan limit 200 min manat təsdiq edildi. 2015-ci ildə hökumət 3 pilləli devalvasiyaya getdi, manat 2 dəfədən çox dəyər itirdi, amma bu limit yenə 200 min manat olaraq aldı.
Deyəsən, bu məsələnin “buzu” əriyir, çox böyük ehtimal, 2026-cı ilin əvvəlindən ƏDV-yə cəlb olunmayan dövriyyə 2 dəfə artırılaraq 400 min manat olacaq.
Hörmətli hökumət, sizə problemləri görmək üçün, azı, 10 il lazım olur, bunu anladıq, amma, yenə də eşidin – 400 min manat da azdır, yenə bir neçə ildən sonra artırmaq məcburiyyəti yaranacaq. Ona görə də, kiçik sahibkarlar, sadələşdirilmiş vergi ödəyiciləri üçün ƏDV-yə cəlb olunmayan dövriyyəni 1 mln. manat etmək lazımdır.
Bir dəfə də vaxtında dinləyin, ölkə iqtisadiyyatında dərin böhran izləri var, ÜDM artmır, iqtisadi aktivlik zəifdir, buna görə də, əsas diqqəti kiçik sahibkarlığa yönəltmək lazımdır. Dövriyyədən cəmi 5% vergi olsun, amma ƏDV-yə düşməyən dövriyyə həddini 1 mln. manata qaldırın. Ölkə, biznes, sahibkarlar, hətta büdcə də bu addımdan ancaq udacaq…