Ukrayna Hərbi Sənaye Kompleksinin (“HSK”) yeni uzaqmənzilli raketlərin (“Flamingo” və “Uzun Neptun”) kütləvi istehsalına başlaması və istehsal güclərini davamlı artırması çox ciddi uğurdur. Lakin burada nəzərə alınmalı bir neçə vacib nüans var.
Rusiyanın Ukraynaya hücumunun ilk günlərindən etibarən müşahidə olunan bir tendensiya var: hər iki tərəf müharibə taktikasını daim dəyişir, xüsusilə raket və dron zərbələri sahəsində. Müxtəlif mərhələlərdə fərqli strategiyalar, müxtəlif dron modelləri, uçuş hündürlükləri, trayektoriyalar və zərbə üsulları tətbiq olunub. Adətən yeni taktikanın tətbiqi əvvəlcə ciddi uğurlar gətirirdi, lakin qarşı tərəf çox tez hərbi-texniki baxımdan uyğunlaşaraq əks-tədbirlər hazırlayırdı. Beləliklə, müharibə “zəhər – peyvənd” prinsipi ilə davam edir: bir tərəf yeni hücum üsulları axtarır(“zəhər”), digər tərəf isə müdafiə və cavab taktikasını(“peyvənd”) inkişaf etdirir.
Yuxarıda qeyd olunduğu kimi, Ukrayna HSK-nin uzaqmənzilli ağır raketlərin istehsalına başlaması çox böyük uğurdur və bu, müharibənin gedişatına ciddi təsir göstərə bilər. Amma bəzi önəmli məqamlar xüsusi diqqət tələb edir.
Hazırda gündə 1 ədəd “Flamingo” raketi istehsal olunur, lakin istehsal gücü fasiləsiz artırılır. Planlara görə, ilin sonuna qədər aylıq istehsal həcmi 200 raketə çatdırılacaq.
Lakin bu mərhələdə Ukrayna Silahlı Qüvvələri bu raketlərdən istifadə etməməlidir. Niyə? Çünki bu tip raketlərin tətbiqi yeni bir kütləvi zərbə taktikasının hazırlanmasını tələb edir. Burada bir çox faktorlar nəzərə alınmalıdır: zərbə dalğalarının sayı, raketlərin və dronların kombinasiyası, yalançı dronların istifadəsi, trayektoriyalar, manevrlər və s. Hal-hazırda Ukraynada bu raketlərin sayı kütləvi zərbələr üçün kifayət deyil və 50-100 raketin atılması üçün yeni taktikanın ifşa etmək məqsədə uyğun deyil.
Buna görə də indiki mərhələdə Ukraynanın qarşısında iki əsas məqsəd var:
1. Uzaqmənzilli raketləri sürətlə istehsal edib, onları maksimum gizlətmək;
2. Rusiyanın hava hücumundan müdafiə (HHM) sistemlərini maksimum dərəcədə sıradan çıxarmaq.
Birinci məqam aydındır. İkincisinə gəldikdə isə, son günlər Ukrayna Təhlükəsizlik Xidmətinin sıradan çıxardığı Rusiyaya məxsus HHM, REB və RLS avadanlıqlarının siyahısı kifayət qədər təsirli görünür:
– 4 ədəd ZRK “TOR-M2”
– 3 ədəd ZQRK “Pantsir”
– 2 ədəd ZRK “S-300”
– 1 ədəd ZRK “BUK-M3”
– 1 ədəd radar 50N6 “S-350”
– 1 ədəd RLS “Kasta-2E2”
– 1 ədəd RLS “Podlyot”
– 1 ədəd REB “Jitel”
– 1 ədəd RLS “Nebo-SVU”
– 1 ədəd RLK 55J6M “Nebo-M”
Başqa sözlə, Ukrayna Rusiyanın HHM şəbəkəsini zəiflətmək istiqamətində ciddi işlər görür.
İndi isə əsas məsələyə keçək.
Son günlər biz Rusiya neft emalı zavodlarına (NEZ) qarşı zərbələrin artdığını müşahidə edirik. Zərbələrin əksəriyyəti dronlar vasitəsilə həyata keçirilir. Təsəvvür edin ki, cəmi 60-100 kq partlayıcı daşıyan dronlar belə bir neçə NEZ-i uzunmüddətli sıradan çıxara bilirsə, bəs eyni obyektə 3, 4 və ya 5 ədəd “Flamingo” raketi, hər biri 1150 kq partlayıcı maddə ilə düşsə, nə baş verər?
Cavab aydındır: o NEZ-dən və ya neft anbarından kül və metal qalıqlarından başqa bir şey qalmaz.
Bu səbəbdən Ukrayna indi bu ağır raketləri istehsal edib ehtiyatda saxlamalıdır. Çünki bir neçə aydan sonra Rusiyanın enerji infrastrukturuna “cəhənnəm günləri” yaşatmaq üçün kifayət qədər arsenal yığmaq strateji baxımdan həyati əhəmiyyət daşıyır.
