Cənubi Avstraliya Universitetinin alimləri antibiotiklərlə bəzi ağrıkəsici dərmanların birgə istifadəsinin ciddi fəsadlar törədə biləcəyini açıqlayıb. Tacxeber.com bildirir ki, tədqiqat nəticələri bu dərmanların bakteriyalarda antibiotiklərə qarşı davamlılığı gücləndirdiyini ortaya qoyub.
Araşdırmada doqquz məşhur preparatın təsiri öyrənilib: diklofenak, ibuprofen, parasetamol, furosemid, tramadol, psevdofedrin, temazepam, metformin və atorvastatin.
Ən təhlükəli təsir ibuprofen və parasetamolda müşahidə olunub. Alimlərin sözlərinə görə, bu preparatlar bağırsaq çöpü bakteriyasının siprofloksasinə qarşı davamlılığını artırır. Daha da təhlükəlisi odur ki, bu dərmanlar birlikdə istifadə edildikdə mutasiya səviyyəsi yüksəlir və bakteriyalar daha çox antibiotikə qarşı dözümlü olur.
Mütəxəssislər bildirirlər ki, parasetamol və ibuprofen bakteriyaların müdafiə mexanizmlərini aktivləşdirərək antibiotikin təsirini zəiflədir. Bu isə infeksiyaların müalicəsini çətinləşdirir və yeni dərman müqaviməti dalğasına səbəb ola bilər.
Alimlər həkimlə məsləhətləşmədən antibiotiklərlə yanaşı ağrıkəsici qəbul etməmək barədə xəbərdarlıq edir. Onların fikrincə, düzgün olmayan dərman kombinasiyası qlobal səviyyədə antibiotik müqaviməti problemini daha da dərinləşdirə bilər.(Foodinfo.az)