Ukrayna prezidenti Vladimir Zelenski bildirib ki, Rusiya əvvəlcə Kiyevlə danışıqların ikitərəfli formatını, sonra isə üçtərəfli formatı təklif edib. Onun sözlərinə görə, Ukrayna liderlər səviyyəsində görüşlərin istənilən variantına hazırdır.
Zelenski vurğulayıb ki, ərazilər məsələsi yalnız onunla Vladimir Putin arasında müzakirə olunacaq. O, tərəfdaşlarına ərazilərə faktiki nəzarəti olan xəritəni göstərib və qeyd edib ki, Kiyev Putin və Tramp arasında mümkün ikitərəfli görüşün təfərrüatlarını bilmir.
“Bu, bizim ən yaxşı görüşümüzdür. Biz çox şeyi ətraflı müzakirə etdik”, – Ukrayna lideri bildirib.
Danışıqlarda həmçinin ukraynalı uşaqların geri qaytarılması yolları, o cümlədən “hamı üçün” – təkcə hərbçilərlə deyil, mülki şəxslərlə də mübadilə variantı müzakirə olunub. Zelenskinin sözlərinə görə, ABŞ Ukrayna üçün təhlükəsizlik zəmanətlərində iştirak etməyə hazır olduğunu açıq şəkildə göstərib.
Prezident 90 milyard dollarlıq yardım paketinin mövcudluğunu təsdiqləyib, onun təfərrüatları on gün ərzində işlənəcək. O, həmçinin Putinlə ilkin şərt olmadan görüşməyə hazır olduğunu bildirib və qeyd edib ki, atəşkəs tələbi Rusiyaya yeni tələblər irəli sürmək imkanı verəcək.