Rəsmi Bakı ABŞ Prezidenti Donald Trampın Azərbaycan və Ermənistan arasında münasibətlərin normallaşmasına, eləcə də Cənubi Qafqaz regionunda rifahın təmin edilməsinə yönəlmiş səylərini yüksək qiymətləndirir.
Bu sözləri Azərbaycanın ABŞ-dakı səfiri Xəzər İbrahim “Washington Examiner”ə müsahibəsində səsləndirib.
“Azərbaycan strateji yanaşmanın şahidi olub. Təbii ki, prezident Tramp əsl lider və əsl sülhməramlıdır. Məhz buna görə də biz ilk gündən onun seçilməsindən sonra əmin idik ki, təkcə bizim regionda deyil, bütün dünyada sülhün, firavanlığın və inkişafın təmin edilməsi üçün səylər göstəriləcək”, – diplomat bildirib.
O qeyd edib ki, Bakı və İrəvan üç ilə yaxındır ki, sülh sazişi istiqamətində son dərəcə səmərəli iş görüblər.
“Ancaq sülh müqavilələri bağlamaq üçün sizə müdaxilə edə biləcək, kömək edə biləcək dünya lideri lazım idi. Və sonra, sözün əsl mənasında, altı ay əvvəl, prezident Tramp seçildikdən sonra sülh gətirmək istəyən bir dünya lideri ortaya çıxdı”, – Xəzər İbrahim bildirib.
Qeyd edək ki, bu məqaləni X sosial şəbəkəsində Ağ Evin mətbuat katibi Caroline Levitt paylaşıb.