Ukrayna prezidenti Vladimir Zelenski ABŞ prezidenti Donald Trampla uzun və mənalı söhbət edib – əvvəlcə təkbətək, sonra isə Avropa liderlərinin iştirakı ilə. Bu barədə RBC-Ukrayna dövlət başçısının Telegram-a istinadən xəbər verir.
Danışıqların ümumi müddəti bir saat yarımı, Trampla isə təxminən bir saatı keçib.
Zelenski Ukraynanın sülh naminə mümkün qədər məhsuldar işləməyə hazır olduğunu təsdiqləyib və Trampın Ukrayna, ABŞ və Rusiya arasında üçtərəfli görüş keçirmək təklifini dəstəkləyib.
Onun sözlərinə görə, bu formatda əsas məsələlər liderlər səviyyəsində müzakirə oluna bilər.
Prezident həmçinin ABŞ-la birlikdə Ukraynanın təhlükəsizliyini etibarlı şəkildə təmin etmək üçün avropalı tərəfdaşların cəlb edilməsinin vacibliyini vurğulayıb.
O əlavə edib ki, bütün müttəfiqləri ilə mövqelərini koordinasiya etməyə davam edir və Ukraynanı dəstəkləyən hər kəsə təşəkkür edir.
Zelenski bazar ertəsi Vaşinqtonda görüş zamanı Trampla müharibənin bitməsinin təfərrüatlarını müzakirə edəcəyini deyib.