İsrail lideri Benyamin Netanyahu İran xalqına müraciət edərək onları İslam Respublikasına qarşı üsyana qalxmağa çağırıb və gələcəkdə İsraildən su təminatı ilə bağlı yardım vəd edib.
Müraciətində Netanyahu iranlıları “qürurlu xalq” adlandırıb və bildirib ki, İslam Respublikası rəhbərləri İsrailə “On iki günlük müharibə”ni sırıblar və onu bərbad şəkildə uduzublar. Onun sözlərinə görə, hazırda İran su təminatı sahəsində ciddi problemlər yaşayır və İsrail bu məsələdə kömək etməyə hazırdır.
“Mənim çox yaxşı xəbərim var: İsrail dünyada suyun təkrar emalı üzrə liderdir. Biz çirkab suların 90%-ni təkrar emal edirik. Həmçinin dünyada duzsuzlaşdırma üzrə də liderik. İranda da kifayət qədər su olması üçün nə etmək lazım olduğunu dəqiq bilirik. Və budur əla xəbər: ölkəniz azad olan kimi, İsrailin ən yaxşı su resursları üzrə mütəxəssisləri hər bir İran şəhərinə gələcək, qabaqcıl texnologiyalar və təcrübə gətirəcəklər. Biz İrana suyun təkrar emalı və duzsuzlaşdırılması işində kömək edəcəyik,” – deyə Netanyahu bildirib.
O əlavə edib ki, İran hakimiyyəti öz xalqına ədalətsiz yanaşır və “insanların ən əsas hüquqlarını əllərindən alır”.
“Belə olmamalıdır. Mən sizi cəsarətli və qərarlı olmağa çağırıram. Xəyal etməyə cəsarət edin. Azadlıq naminə risk edin. Gələcəyiniz, ailələriniz naminə. Buna dəyər! Küçələrə çıxın. Ədalət tələb edin. Hesabatlılıq tələb edin. Zülmə qarşı etiraz edin. Ailəniz və bütün iranlılar üçün daha yaxşı gələcək qurun. Və bilin: siz tək deyilsiniz. Mən sizinləyəm. İsrail sizinlədir. Bütün azad dünya sizinlədir,” – deyə İsrail lideri vurğulayıb.
Netanyahuya görə, Tehranda hakimiyyət dəyişikliyi baş verərsə, İranda sürətli dəyişikliklər olacaq:
“Tezliklə ölkəniz azad olacaq. Su kifayət qədər olacaq. İqtisadiyyatınız bərpa olunacaq və çiçəklənəcək. Övladlarınız yenidən sevincli və qayğısız olacaq. Dövlətimizin qurucusu Teodor Hertsel yəhudi dövləti haqqında demişdi: ‘Əgər istəsəniz, bu, nağıl olmayacaq’. Mən də sizə deyirəm: əgər istəsəniz, azad İran nağıl olmayacaq. İndi hərəkət etmək vaxtıdır. İndi azadlıq uğrunda mübarizə vaxtıdır. İran – iranlılar üçün,” – deyə Netanyahu yekunlaşdırıb.