ABŞ-da insan alveri və cinsi istismarda ittiham olunaraq məhkum edilən və Ceffri Epşteynin yaxın silahdaşı kimi tanınan Gyslen Maksvellə ABŞ Ədliyyə Nazirliyi tərəfindən məhdud toxunulmazlıq verilib.
Tacxeber.com xəbər verir ki, bu barədə NBC News məlumat yayıb.
Məlumata görə, toxunulmazlıq Maksvellə 2021-ci ildə aldığı məhkumluqla bağlı istintaq orqanlarına geniş ifadə vermək imkanı yaradıb. O, ABŞ baş prokurorunun müavini Todd Blanşa təxminən doqquz saatlıq ifadə verib.
Maksvellin vəkili bildirib ki, o, təxminən 100 nəfərlə bağlı sualları cavablandırıb və “heç nə gizlətməyib”. Maraqlısı budur ki, vəkilin sözlərinə görə, Maksvell hələ birbaşa müraciət etməsə də, ABŞ Prezidenti Donald Trampdan əfv almaq niyyətindədir – əvəzində isə istintaqa tam əməkdaşlıq təklif edir.
Qeyd edək ki, Gyslen Maksvell uzun illər ərzində milyarder Epşteynin yanında fəaliyyət göstərib, azyaşlıların cinsi istismarı ilə bağlı şəbəkədə əsas təşkilatçılardan biri kimi tanınıb. Hazırda onun ifadələrinin Epşteyn işi ilə bağlı yeni adların ifşasına səbəb ola biləcəyi gözlənilir.