Gürcüstan prokurorluğu uran maddəsini qeyri-qanuni şəkildə əldə edən, saxlayan, mülkiyyətdə saxlayan və ondan istifadə etmək istəyən Gürcüstan və Türkiyə vətəndaşlarına qarşı ittiham irəli sürüb.
Tacxeber.com xəbər verir ki, Gürcüstan Dövlət Təhlükəsizlik Xidmətinin (DTX) apardığı araşdırma zamanı məlum olub ki, Gürcüstan vətəndaşı radioaktiv maddəni (uranı) qeyri-qanuni şəkildə əldə edərək saxlayıb. Həmin maddə nüvə materialları kateqoriyasına aiddir və insan sağlamlığı üçün təhlükə mənbəyidir.
Həmin şəxs bu materialı 3 milyon dollara Türkiyə vətəndaşına satmaq istəyib. DTX əməkdaşları hər iki şəxsi Batumidə tutub.
Saxlanılanlara “Nüvə materiallarının və ya qurğularının, radioaktiv tullantıların, radioaktiv maddələrin qeyri-qanuni dövriyyəsi” maddəsi ilə ittiham irəli sürülüb. Onlar 10 ilədək azadlıqdan məhrum edilə bilərlər.
Cinayət işi ilə bağlı araşdırma davam edir.