“Meta” şirkətinin rəhbəri Mark Zukerberq ABŞ prezidenti Donald Trampın iştirakı ilə keçirilən gizli müşavirə zamanı Oval kabinetə qəfil daxil olduqdan sonra ordan çıxarılıb.
Tacxeber.com “Qaynarinfo”-ya istinadən xəbər verir ki, bu barədə NBC telekanalı öz mənbəsinə istinadla məlumat yayıb.
Bildirilir ki, hadisə Trampın ABŞ hərbi rəhbərliyi ilə altıncı nəsil “F-47” qırıcı təyyarəsinin perspektivlərini müzakirə etdiyi zaman baş verib. Zukerberqin bu müzakirə zamanı qəfil Oval kabinetin qapısında peyda olması müşavirədə iştirak edənlərin narahatlığına səbəb olub. Bundan sonra o, otaqdan çıxmağa məcbur edilib.
“Meta” rəhbərinin belə yüksək səviyyəli və məxfi görüşlərə qatılmaq üçün lazımi icazəsi olmadığı üçün bəzi rəsmi şəxslər bu hadisəni təhlükəsizlik baxımından narahatedici hal kimi qiymətləndiriblər.