İranlı islam alimi, ayətullah Məkarim Şirazi ABŞ prezidenti Donald Trampa qarşı fətva (dinə əsaslanan hökm) verib.
Tacxeber.com-ın “FOX”a istinadən məlumatına görə, fətvada bildirilir ki, dünya islam icmasının (ümmətin) liderliyinə və birliyinə meydan oxuyan və ya onu təhlükəyə atan hər bir şəxs və ya hökumət “müharibə aparan” (muharib) – yəni Allaha qarşı savaşan – kimi qəbul olunmalıdır. İran qanunvericiliyinə görə, “muharib” kimi tanınan şəxslər edam edilə, çarmıxa çəkilə, əlləri və ayaqları kəsilə və ya sürgün edilə bilər.
Fətvada daha sonra deyilir:
“Son günlərdə ABŞ Prezidenti və sionist rejimin liderləri dəfələrlə İranın ali liderinə (Xamenei) və bəzi mərceyi-təqlidlərə (dini nüfuz sahiblərinə) qətllə hədələr səsləndiriblər. Ali lideri və dini rəhbərləri öldürmək planını qurmaq İslam hüququna görə böyük bir cinayətdir və ağır şəkildə cəzalandırılmalıdır. Dünyanın bütün müsəlmanları onlardan intiqam almalı, bunu qəzəb və güc ilə etməlidir” – Şirazinin fətvasında belə deyilir.