Otuz yaşdan sonra sevən adamlara birtəhər baxıram. Yəni adam nə qədər səy olmalıdır ki, otuz yaşdan sonra da kimisə sevsin, aşiq olsun. Otuzdan sonra kimisə sevən, aşiq olan adamların hamısı hələ də düşük türk serialları izləyənlərdi.
Adam tanıyıram ki, qırx yaşı var, hələ də həyatının sevgisini gözləyir. Nə deyəsən beləsinə? Heç kimin də xətrinə dəymək istəmirəm. Amma…
Ay bacım, gir internetdə şəkərlə, təzyiqlə bağlı araşdırma elə, gör bu revmatizmanın türkəçarə yolla həlli necə olur. Getdi e ta Burak Özçivit. Bundan sonra sənin Burak Özçivitin dərmanlardı.
Otuzdan sonra sevən kişilər isə, ümumiyyətlə… Bilmirəm nə deyim ki, kobud çıxmasın. Qırx yaşı var, kiməsə “aşkım” deyir. Ayıbdı, ə, yekə kişisən, özünə hörmət elə, “aşkım” nədi?
Açığı, otuzdan qabaq da sevmək səylikdir, amma təbii prosesdir də, neynəmək olar. Uzağı, 21-22 yaşında sevgi söhbətlərini bağlamaq lazımdır. (Ulucay Akif)