Qidalanma üzrə mütəxəssislər gündəlik rasionda çuğundura yer verməyin sağlamlıq üçün əhəmiyyətli olduğunu bildiriblər.
Tacxeber.com xarici KİV-ə istinadla xəbər verir ki, zəngin tərkibi ilə tanınan bu tərəvəz ürək-damar sağlamlığından tutmuş beyin fəaliyyətinə qədər bir çox sahədə müsbət təsir göstərir.
Çuğundur A, B6, C vitaminləri ilə yanaşı, dəmir, maqnezium, kalium və fol turşusu baxımından zəngindir. Bu maddələr orqanizmdə enerji səviyyəsini artırır, immun sistemini gücləndirir və hüceyrələrin yenilənməsinə kömək edir.
Araşdırmalar göstərir ki, çuğundurdakı nitratlar qan damarlarını genişləndirərək qan təzyiqini aşağı salmağa kömək edir. Bu, çuğunduru hipertoniya ilə mübarizədə təbii vasitəyə çevirir.
Çuğundur qan dövranını gücləndirərək beyinə daha çox oksigen çatmasını təmin edir. Bu, yaddaşı və diqqət qabiliyyətini artırır, yaşlı insanlarda isə demensiya riskini azalda bilər.
Liflərlə zəngin olan çuğundur həzm prosesini sürətləndirir, qəbizlik və digər bağırsaq problemlərinin qarşısını almağa kömək edir.
Çuğundur qaraciyərin fəaliyyətini dəstəkləyərək orqanizmdə toplanan toksinlərin atılmasına kömək edir. Bu səbəbdən bir çox detoks proqramlarında çuğundur suyu əsas komponentlərdən biridir.
Bəzi idmançılar məşqdən əvvəl çuğundur suyu qəbul edirlər, çünki bu, əzələlərə oksigenin daha yaxşı daşınmasına və daha uzun müddət enerji saxlamağa imkan verir.
Qidalanma mütəxəssisləri çuğunduru həftədə bir neçə dəfə yeməklərə əlavə etməyi və ya təzə halda salat və şirə şəklində qəbul etməyi tövsiyə edirlər.