“Tehranın əlində Yaxın Şərqdəki ABŞ Silahlı Qüvvələrinin İran ərazisinə zərbələr endirməkdə İsraili dəstəklədiyinə dair dəlillər var”.
Tacxeber.com TASS-a istinadən xəbər verir ki, bunu İranın xarici işlər naziri Abbas Əraqçı Tehranda əcnəbi diplomatlarla görüşündə deyib.
Onun sözlərinə görə, İsrailin İrana qarşı təcavüzü ABŞ-nin razılığı və dəstəyi olmadan həyata keçirilə bilməzdi:
“Birləşmiş Ştatlar İrana qarşı hücumların şərikidir və məsuliyyəti öz üzərinə götürməlidir”.
Daha əvvəl ABŞ Prezidenti Donald Tramp “Truth Social” platformasında yazmışdı ki, İsrailin İrana son hücumunda Vaşinqtonun əli yoxdur.
O, əlavə edib ki, əgər İran ABŞ-yə hər hansı bir şəkildə hücum edərsə, Amerika Silahlı Qüvvələrinin bütün qüdrəti “əvvəllər heç vaxt görünməmiş miqyasda” onun üzərinə hücum çəkəcək.
Əraqçı Trampın bəyanatlarına cavab olaraq söyləyib:
“Son iki gün ərzində müxtəlif kanallar vasitəsilə ABŞ-dən onların bu hücumda iştirak etmədikləri və iştirak etməyəcəkləri barədə təminatlar almışıq. Biz bu bəyanatlara inanmırıq, çünki əlimizdə olan dəlillər bunun əksini göstərir”.