“Bakıda “Bağırov” körpüsünü götürmək lazımdır. Yerində daha müasir tipli körpü salınmalıdır. Yolu düzləmək lazımdır ki, yağış suları yığılıb qalmasın, avtomobillərin hərəkətinə maneə olmasın”.

 

Bu sözləri Pravda.az-a açıqlamasında sabiq deputat, Vəhdət Partiyasının sədri Tahir Kərimli deyib.

 

“Çində, Yaponiyada evlərin üstündən belə yollar salırlar. Bizdə bunu etmək nə çətin məsələdir? Kanalizasiya sistemi də başqa bir dərddir. Bütün ölkə, xüsusilə Bakı şəhəri üzrə. Bu məsələ üzərində ciddi işləmək lazımdır. Hər zaman güclü yağışlar yağanda düşünürəm ki, nə üçün yolun səviyyəsini bu qədər aşağı salıblar? Qatar düz getsin deyə altını qazıblar, dərə ediblər. Göründüyü kimi, “Bağırov” körpüsünün altında hər hansı kanalizasiya sistemi yağış sularını çəkmək iqtidarında deyil. Buna görə də düşünürəm ki, o körpüyə nə ehtiyac var? Düzdür, yanlarından yol xətləri çəkilib. Amma kifayət etmir. Əsas axın körpünün altından olur. Hər dəfə yağış yağır, yol tutulur. 2024-cü ildə bədbəxt hadisələrin də şahidi olduq. Fikrimcə, Bağırov körpüsünü rekonstruksiya etmək, yenidən doldurmaq, yolun səviyyəsini düz etmək lazımdır. Əgər qatar yolu həmin ərazidə vacibdirsə, başqa cür planlamaq olar”, – Tahir Kərimli bildirib.

Tacxeber.com