Toronto Universitetinin alimləri tənhalığın qavranılmasında gender fərqlərini aşkar edib və qadınların tənhalığı kişilərdən daha yaxşı keçirdiyini müəyyən ediblər.
Tacxeber.com Oxu.Az-a istinadən xəbər verir ki, tədqiqat “Social Psychological and Personality Science” jurnalında dərc edilib.
18-75 yaş arası təxminən 6000 iştirakçı arasında toplanan məlumatların təhlili göstərib ki, qadınlar ümumilikdə tənha həyatlarından daha çox məmnundurlar. Lakin onlar kişilərə nisbətən cinsi məmnuniyyət barədə daha çox narahatdırlar ki, bu da münasibətdə olan insanlar arasında aparılan oxşar sorğunun nəticələrinin tam əksidir.
Həmçinin məlum olub ki, qadınlar romantik münasibətlərə daha az can atırlar və onların xoşbəxtliyi daha çox sosial mühitdən və özünü reallaşdırmadan asılıdır. Eyni zamanda, kişilər üçün romantik münasibətlər rifahın əldə edilməsində əsas rol oynayır.
Alimlərin fikrincə, bu nəticələr bədbəxt və tənha qadınlar haqqında stereotipləri təkzib edir və göstərir ki, bir çoxları üçün tənhalıq müsbət təcrübə və həyatın mənalı mərhələsidir.